5個救火英雄的自白 火場實況首曝光

牛頭角時昌迷你倉4級火奪去2名消防員的性命，叫人心傷，尤其是並肩作戰的消防員，他們親歷火場的兇猛，昨晚（23日）至今，社交平台陸續流傳前線消防員的心聲，撇除投訴、埋怨、怪責，且聽聽他們的親身經歷，認清困難，齊心撲熄這場無情火。

消防員1：

我們做四樓，兩隊車更，兩個兩個輪流入，大概每人做2分鍾就出返來抖一抖，其實四樓溫度好高，都入唔到好多，因為後樓梯的樓梯口，外牆一上到去就已經感應到那裏熱力是好勁，同埋幅牆已經裂晒，石屎爆了出來，其實真的有少少驚倒塌。

▲ 相片來源：facebook

消防員2：

同事已做了消防20幾年，望到現場覺得有點恐懼，做消防這麼多年未試過，因為見到那些煙一時猛、一時弱，好似想引你入去，然後就食咗你兩件(兩名殉職消防員)，然後再整傷大家。感覺毛管戙。

消防員3：

火場温度高到嚇死人，件黃金戰衣太耐熱，所以當消防員感覺到炙熱時， 其實消防員已經走唔切，因此非常危險。反而幾十年前嘅土炮膠衣更安全，一覺熱就即走，得以保命。

消防員4：

每人入得去兩分鐘都頂唔順出來，根本個火場溫度真係好高好高，根本就係唔適宜入去。如果兩分鐘都頂唔度就要出來，入面真係熱得好緊要。

消防員5：

昨天我揹樽帶同事入火塲3樓，一心想進攻式滅火，但當我一步步摸住牆，由彎腰前進到慢慢蹲下身來慢行，不時用帶着抗火手套抹面罩，想得到良好的視野，卻只能看到自己的手，卻看不到前方一尺的地方，四周環境酷熱，歷時15分鐘也只能行到一條喉的距離（約23米）；開始意識到人的能力真是好有限，莫講再去揾火源位置及滅火。

政府紀律部隊人員總工會副主席麥錦輝說：「我們一個都不能少，我們有同事很激動，原因是派多少人進去，就應該帶多少人走，這個從來都是我們的使命，也是我們的格言。所以那些所謂的傳言，我們覺得如果他不是無知，就是別有用心，我很希望是無知。」

今日亦有火場內的實況照片首曝光，當中包括2樓、3樓及4樓。照片可見，火場內濃煙密佈，部分牆壁懷疑是熱得出現剝落，樓梯上放滿消防喉。